Adferiad yn Lansio Gwasanaeth Cymorth Tai Newydd i Unigolion Digartref ar draws Sir y Fflint

Mae’n bleser gan Adferiad gyhoeddi lansiad ein gwasanaeth newydd, Tai yn Gyntaf Sir y Fflint! Gan adeiladu ar y ddarpariaeth Tai yn Gyntaf y mae Adferiad wedi’i darparu ym Mhen-y-bont ar Ogwr ers 2022, mae’r gwasanaeth hwn a ariennir gan Grant Cymorth Tai yn darparu cymorth sy’n gysylltiedig â thai i’r rhai sy’n ddigartref neu sydd mewn perygl o fod yn ddigartref ar draws Sir y Fflint.

Trwy feithrin perthynas ag unigolion sydd â hanes o ymddieithrio oddi wrth wasanaethau sy’n profi ystod o amgylchiadau cymhleth, mae’r Gwasanaeth Tai yn Gyntaf yn gweithio gyda phob unigolyn i gyd-gynhyrchu cynlluniau cymorth sy’n diwallu eu hanghenion penodol. Gan ganolbwyntio ar gryfderau a nodau a gweithredu i leihau niwed i unigolion, mae’r gwasanaeth yn cefnogi rhai o’r unigolion sydd fwyaf mewn perygl yn Sir y Fflint i gael mynediad i lety diogel, cynaliadwy a’i gynnal.

Ar gael i’r rhai sy’n 16 oed neu’n hŷn sy’n ddigartref, yn byw mewn llety dros dro, neu sydd mewn perygl o fod yn ddigartref, mae Gwasanaeth Tai yn Gyntaf Sir y Fflint hefyd yn cysylltu â landlordiaid, cyrff statudol ac asiantaethau gwirfoddol yn unol â gofynion pob unigolyn. Gydag ymrwymiad i ddarparu cymorth amserol ac effeithlon i’r rhai sy’n profi amgylchiadau heriol fel afiechyd meddwl, defnyddio sylweddau, neu ymddygiad troseddol, ochr yn ochr ag anawsterau sy’n gysylltiedig â thai, nod gwasanaeth Tai yn Gyntaf Sir y Fflint yw grymuso unigolion ar eu taith tuag at annibyniaeth, hunanreolaeth ac adferiad.

Dywedodd Naomii Oakley, Cyfarwyddwr Gweithrediadau (Gogledd), Adferiad:

“Rydym wrth ein bodd ein bod yn gweithio gyda Chyngor Sir y Fflint i gyflawni’r Prosiect Tai yn Gyntaf newydd! Bydd ein tîm cymorth ymroddedig yn helpu unigolion i sicrhau cartrefi diogel a pharhaol tra’n darparu gofal personol, cofleidiol i’w grymuso i gynnal sefydlogrwydd. Allwn ni ddim aros i gefnogi eu taith a dathlu eu camau tuag at ddyfodol mwy disglair, mwy diogel.”

Mae gwasanaeth Tai yn Gyntaf Sir y Fflint ar gael rhwng 8am ac 8pm o ddydd Llun i ddydd Gwener, gyda darpariaeth ar-alwad hyblyg yn cael ei darparu dros benwythnosau yn unol â’r galw. Gellir cyfeirio at y gwasanaeth trwy Lwybr Atgyfeirio Cyngor Sir y Fflint.